៤ គោលដៅទេសចរណ៍ធំៗ ដែលខេត្តកែបគ្រោងនឹងធ្វើការអភិវឌ្ឍឆាប់ៗនេះ!
ថ្លែងនៅក្នុងកម្មវិធីជួបជុំ “New Year’s Cocktail” កាលពីល្ងាចថ្ងៃទី២២ ខែមករា ឆ្នាំ២០២៤ កន្លងទៅថ្មីៗនេះ លោក សោម ចិន្តា ប្រធានមន្ទីរទេសចរណ៍ខេត្តកែប បានឆ្លៀតឱកាសនេះផ្តល់មតិដោយលើកឡើងនូវតំបន់ទេសចរណ៍ធំៗចំនួន ៤ ដែលខេត្តកែបគ្រោងនឹងធ្វើការអភិវឌ្ឍនាពេលខាងមុខនេះ។ តំបន់ទេសចរណ៍ទាំងនោះរួមមាន៖
១. តំបន់ទីក្រុងកែបចាស់
២. តំបន់ឆ្នេរអង្កោល
៣. តំបន់ប្រជុំកោះ ដែលសម្បូរដោយជីវៈចម្រុះ គ្រោងនឹងបង្កើតជាឧទ្យានបាតសមុទ្រ
៤. តំបន់ភ្នំវល្លិ៍
តាមរយៈការអភិវឌ្ឍគោលដៅទេសចរណ៍ខាងលើ ខេត្តកែបរំពឹងថានឹងទទួលបានភ្ញៀវទេសចរណ៍មកលេងកម្សាន្តកាន់តែច្រើនថែមទៀតនាពេលខាងមុខ។
សូមបញ្ជាក់ផងដែរថា កាលពីល្ងាចថ្ងៃទី២២ ខែមករា ឆ្នាំ២០២៤ មានកម្មវិធីជួបជុំ “New Year’s Cocktail” មួយដែលបានរៀបចំឡើងដោយ Kep West ដើម្បីអបអរសាទរឆ្នាំសកល២០២៤ ក្រោមអធិបតីភាព លោក សោម ចិន្តា ប្រធានមន្ទីរទេសចរណ៍ខេត្តកែប លោក Jef Moons ស្ថាបនិករីសតថ្ងៃបាំងឆ័ត្រ រួមទាំងសហគ្រិន និងប្រត្តិបត្តករទេសចរណ៍មកពីខេត្តកំពត និងខេត្តកែបជាច្រើននាក់។
កម្មវិធីនេះធ្វើឡើងដើម្បីជួបជុំ សំណេះសំណាល និងផ្លាស់ប្តូរបទពិសោធន៍គ្នាទៅវិញទៅមកទាក់ទងនឹងវិស័យទេសចរណ៍ដើម្បីចូលរួមអភិវឌ្ឍវិស័យនេះអោយកាន់តែរីកចម្រើនថែមទៀត។