ពេលខ្លះចង់ជួបគ្នាជជែកការងារ រឺធ្វើកិច្ចការសាលាជាក្រុម តែមិនដឹងទៅណាមែនទេ? ខាងក្រុមការងារ Visit Kampot សូមណែនាំហាងកាហ្វេទាំង ៦កន្លែងដែលមានទីតាំងក្នុងក្រុងកំពត មានបរិយាកាសល្អ និងផាសុកភាព អំណោយផលដល់ការជួបជុំតាមតម្រូវការ។

1. Silence Coffee

ជាហាងកាហ្វេបែបស្ងប់ស្ងាត់ និងសម្បូរដោយរុក្ខជាតិបៃតងតូចធំ ធ្វើអោយអារម្មណ៍ស្រស់ស្រាយ និងជួយបង្កើតគំនិតថ្មីៗ។ ភេសជ្ជៈប្រចាំហាងនៅទីនេះគឺ​ “Iced Signature Coffee” ដែលអ្នកទាំងអស់គ្នាអាចសាកល្បងបាន។ 

2. Lotus café

ហាងកាហ្វេនេះ មានការរៀបចំតុបតែងប្រកបដោយភាពច្នៃប្រឌិត​ កន្លែងអង្គុយមានសភាពធំទូលាយ បរិយាកាសស្ងប់ស្ងាត់ ងាយស្រួលពិភាក្សាការងារ រឺធ្វើកិច្ចការសាលាផ្សេងៗ ជាពិសេសមាន “កាហ្វេអំបិល” ដែលជាភេសជ្ជៈផ្សំឡើងដោយរូបមន្តពិសេសរបស់ហាង។

3. JULY CAFE

ក្នុងហាងមានបរិយាកាសល្អ កន្លែងអង្គុយធំទូលាយ និងមានផាសុកភាព។ នៅទីនេះ យើងអាចអង្គុយអានសៀវភៅ ផាត់ពណ៌គំនូរ ធ្វើកិច្ចការសាលា រីករាយជាមួយភេសជ្ជៈ និងនំខារ៉ាមែលដ៏ឈ្ងុយឆ្ងាញ់។
 

4. Corner Café

Corner Café ជាហាងកាហ្វេមួយកន្លែងដែលមានការរៀបចំតុបតែងដេគ័រយ៉ាងស្រស់ស្អាត ស្រួលអង្គុយធ្វើការ ជជែកគ្នា។ ទីនេះមានលក់ជាប្រភេទកាហ្វេ ភេសជ្ជៈជាច្រើនមុខ និងអាហារសម្រន់ដ៏ឆ្ងាញ់ពិសារថែមទៀតផង។ 
 

5. ផាកអ៊ីន កាហ្វេ

កាហ្វេមានរសជាតិឆ្ងាញ់ បើមានកន្លែងអង្គុយធំទូលាយ មានម៉ាស៊ីនត្រជាក់ទៀត កាន់តែមានផាសុកភាព ចង់ជុំគ្នា ពិភាក្សាការងារ ស្វែងរកគំនិតថ្មីៗ រឺធ្វើកិច្ចការសាលាអី ក៏ប្រព្រឹត្តទៅយ៉ាងរលូន។ ទាំងអស់នេះ មាននៅ ផាកអ៉ីន កាហ្វេ បើកចាប់ពីម៉ោង ៧ព្រឹកដល់ម៉ោង ៦ល្ងាច។ 
 

6. ភូមិកំពត

ថ្វីត្បិតតែមានទីតាំងស្ថិតនៅជាយក្រុងបន្តិចមែន តែទីនេះគឺជាកន្លែងដែលមានទីធ្លាធំទូលាយ សម្បូរដោយរុក្ខជាតិបៃតង ជាប់មាត់ទឹក។ បរិយាកាសនៅទីនេះពិតជាស្រស់ស្រាយណាស់ សមល្មមសម្រាប់ការណាត់ជួបផ្សេងៗ។ 

អត្ថបទដោយ៖ ដែង សុជាតា